1Th 4 | WSK | STEP | Aga singsang, ana munan nina te diram la bagaral se Kaem ko amilmilurukko mu ninga kasurman se ikiman. Ale nina munan borta karo tuiwasan. Bare ana aitak Kari Biya Jesus ko nup te den aora nuam ninga manorsan, munan umutang la gira udagi bita se bagaralko.

1 Thessalonians 4

Bagara aolak Kaem ko kueso wore ko den

1 Aga singsang, ana munan nina te diram la bagaral se Kaem ko amilmilurukko mu ninga kasurman se ikiman. Ale nina munan borta karo tuiwasan. Bare ana aitak Kari Biya Jesus ko nup te den aora nuam ninga manorsan, munan umutang la gira udagi bita se bagaralko.

2 Nina den suen biya nanga Biya Jesus nup te ningarman mu ko ikisan.

3 Kaem ko gomang mu nina saman katagot me beteral, am kako nunguningkiri bagaralko. 4 Ale nina munan kako diram te la ninimi gial ale ninimi ko nguanga se nuwus kuari bagaralko. 5 Nina kariimet Kaem ko me ikia alo mu nunga iwita nemetam nengemang me barasukko. 6 Bo ta munan kuali kapuruk ale bo ko imet ilak me tere naukko. Mel mu ko ana ulengkala wetang te ninga manorman, kari munan uwuta beteso, mu Kari Biya memek tuokko. 7 Mu awuk, Kaem ana kilek memek betenakko me nanga auram, ana laili kako baganakko nanga auram. 8 Buta se kari awiriya den imi buring tuso, mu nu kari nunga den buring me tuso. Mena. Nu Kaem, ko Korang Bur kako nunguningkiri nina ningarso, umutang ko den nu buring tuso.

9 Ani saki alo nengemang tua ko munan mu ko den saki batagik ale me ningarikko. Mu awuk, Kaem munan imi ko ninga kausam se ninimi ko kuesan. 10 Ale Macedonia am lilim ningi nongomang ningi nunguning alo suen la nunga kuesan. Bare aga singsang, ana ninga manorsan, munan umutang la ninguru bita se bagaralko.

11 Nina suwan suwan ninga ikia suwanta te, munan kutek am mu te baga se, nengeta ninga ura ilu se bagaralko. Yam baga se saki nunga ura ko nubiring ko munaka munaka me geragalko. Munan umutang ana mungkala ko ninga manorman. ^{▼▼1 Thes 4:11 Nangata nanga ura ilu se baganakko: Eph 4:28; 2 Thes 3:10-12; Col 4:5.} 12 Umutang te nina mel saki ko me tukunang aralko. Se kariimet saki nina nengerak me bagasan mu ninga ninip patawomonko.

Kari Biya tairuk mu te Kris alo nu ilak biguwumonko

13 Aga singsang, anananga nangamang nina saki alo kua lagaman mu nunga duap ko me ngualaralko. Kariimet saki kuera ale barasa ko ikia nongote me aniso, bare nunga turan nengemang bataga se lagaral bore ko. 14 Ana mu Jesus kueram bare aking barasam mu ko nangamang ningi nunguning aram. Buta se, ana mel imi ko betela nangamang ningi nunguning aram: Tom Jesus peleruk tairukko tom mu te, Kaem baluk se kariimet Jesus ko nongomang ningi nunguning baga kueman mu nu ilak taimonko.

15 Kari Biya balam borta tala ana ninga manorsan: Tom Kari Biya peleruk tairukko, mu ana kariimet marak bagasan mu girinak me barasanakko, kariimet giriman kua lagaman umutang girimon barasomonko. ^{▼▼1 Thes 4:15 Jesus tairuk mu ana Kris alo barasanak nu kote biguwunakko: 1 Cor 15:51-53.} 16 Mu aira biya, se engel nunga supuling ko kuring, se Kaem ko biugel mu niaruk, umutang te Kari Biya duruk wonong bitiruk ale tai kapuruk se, kariimet noko nongomang ningi nunguning ago kua lagaman mu girimon barasomonko. 17 Asele ana kariimet arikaya noko tala tom mu te am marak bagasan, mu arungak biguwunak ale, taiti nuwi ningi kuali nama tariginak ale, Kari Biya Jesus aringinak ale eng nu ilak tom suen biya baganakko.

Umutang ko, nina den imitang te ninimi nengemang iralko.

18